Tag 1 . . . Sonntag 15. September 2024
Prachtswätter. Schlüssu dräit. Rüggewind usem Hasli. Isch grad chli zviu vo Auem...  

Tag 1 . . . Sonntag 15. September 2024
Grossi Emotione in Spiez (Jubiläum, Abreis, Abschied, uf zu Nöiem).  

Tag 1 . . . Sonntag 15. September 2024
Gschafft! Tagesziu Thun erreicht. Regiozug u ab id Houptstadt...   ↦ 60km   ↥ 350Hm

Tag 1 . . . Sonntag 15. September 2024
Schlemme mit Brige und Lucio. Merci fürz Sofabett u so!  

Tag 2 . . . Montag 16. September 2024
Fotoshooting im Breitsch. Sidefini Zugfahrt. Komplizierts Check-in id Ungerkunft. Velodüse ad Rhone. Apero mit Sunne im Gsicht.  

Tag 3 . . . Dienstag 17. September 2024
Akunft in Nantes, Pastis u Jus im Jardin u scho gli U.M.  

Tag 4 . . . Mittwoch 18. September 2024
Ungueti Nacht au toilette. Schlaftag. Usgnockt. Matt.  

Tag 5 . . . Donnerstag 19. September 2024
Verlängerigstag in Nantes zum Gxunde. D Morau fahrt Achterbahn. Stadtbummu. Jardin des plantes. Erwachendi Läbensgeister mit wieder chli Appetit. Morn geits ändläch los!  

Tag 6 . . . Freitag 20. September 2024
Startkafi am Bahnhof. Fährifahre über d Loire. Bänklipicknick. I can smell the beach, baby. Nach erschtem Bewegigstag ar heisse Herbschtsunne Zäutnacht am Atlantik - zrügg am grosse Teich, wow!   ↦ 60km   ↥ 160Hm

Tag 7 . . . Samstag 21. September 2024
Früeche Schtart i Tag für paar Kilometer südwärts vor dr Wätterfront. Erschte Veloschade no vorem Zmorge, jemmers. Flashback ds Bouin: ir gliche Nische wi letscht Jahr hei mr dert abri vor de Schturzbäch gfunde. 1.5 Schtund Rägechleider u Morau teschtet - si hei beschtande. Trochnigs Daheim, es gflickts Velo u öpis warms im Buch - what a day.   ↦ 40km   ↥ 40Hm

Tag 8 . . . Sonntag 22. September 2024
Start mit herbstgrauem Himmu. Glii scho Gaffee u Sunne am Meer. Ä Tag ohni Uhr, Muse sich la ds triebe. Wunderschöni Velowägli, kilometerlang ar Küste entlang. Bänklipouse am Atlantik u stuune. Im T-shirt acho im Starthafe vor Vendée Globe. Krönig vom Tag: Pizza u Bier ar Meerpromenade. Ä facetteriiche super Velotag. Meh vo dene!   ↦ 50km   ↥ 110Hm

Tag 9 . . . Montag 23. September 2024
Ruhe- u Rägetag mit chli schaffe u flaniere, wösche u plane.  

Tag 10 . . . Dienstag 24. September 2024
Heftige Räge ir Nacht. Zum Müeslizmorge wird’s besser. U nachem Velo vom Balkon obeabetrage, wird dr Himmu blau. 62 abwächsligsriichi Velokilometer zersch dür verwaisti Touriorte am Meer. När dürnes irisch ahmuetends Naturschutzgebiet mit Schaf u Wasserstrasse im Inland. U zum Schluss überne üsserscht asträngendi Sandpiste dür Naduwäuder. Mit Rüggewind bi Simon und Paulines auerliebschter Ungerkunft (mit früschem Öpfusaft im Chüeuschrank) acho u härzlech begrüesst worde.   ↦ 62km   ↥ 213Hm

Tag 11 . . . Mittwoch 25. September 2024
Fasch 40km gäge Wind u Räge. D’Wätterkontraschte vo Tag zu Tag si bemerkenswärt u fordernd. Früeche Fiumabe mit heissem Yogi-Tee im Huli u vorfröidig uf Schtadt-Tage ds La Rochelle wo mr wei dr Schturm ushocke.   ↦ 37km   ↥ 131Hm

Tag 12 . . . Donnerstag 26. September 2024
Churzi, nassi Fahrt dür Wind u Räge iz Stedtli La Rochelle. Hafe mit viu Gschicht u Aktualität: zwöi Boot vor Vendée Globe im Hafe parat - wow! Touristepriise für Crêpe u Ricard - botz. Flaniere im inzwüsche sunnige Sturm. Immer Hunger (Ungerkunft über dr Chuchi vom Michelin-Gourmet-Tämpeli - fein).   ↦ 5km   ↥ 20Hm

Tag 13 . . . Freitag 27. September 2024
Usschlafe. Büecher fertig läse. Mama Focaccia zum Zmorge. Märitbsuech für Znacht. Schlendere zwüsche zwe stürmische Rägepouse. Plane u z'Fadeschlah vode nächste Velotage u -etappe.  

Tag 14 . . . Samstag 28. September 2024
Zwöi Mau attakiert vo Hünd. Späts Märitbrot- u Töpperweer-Zmorge am Meer. Überraschends Velofahrverbot über d'Brügg. Drum Zwangspouse in Rochefort bis zum spektakuläre Transport en Transbordeur überd Charente. Chli Amerika-Quartier, chli Camargue-Feeling, chli Rüggewind - so schöööön. U dr Tag no lang nid ds Änd: nomau e Flussquerig, das mau über d'Brügg mit Blick uf ds offne Meer. Sädle im ds fridne, ruige Naturcamping. Linseeitopf u ab ad Wermi - es isch chaut.   ↦ 83km   ↥ 250Hm

Tag 15 . . . Sonntag 29. September 2024
E chline Chlupf nam erwache. Ds Wätter chert scho wieder - es blibe nume paar trochni Schtund. U o die nächschte Tage gse schitter us. 20km San Francisco-Style (ufabufab) uf Royan. Bir Kaffeephouse Uslegeornig u Richtigswächsu. Statt ufd Fähre Richtig Arcachon geits nach Saintes mit Müglechkeite (Zug etc.).   ↦ 21km   ↥ 140Hm

Tag 15 . . . Sonntag 29. September 2024
Picnic are verwaiste Bushauteschteu. Tropfnass in Saintes agschwemmt worde. U d'Schnouze vou vo Chaut u Nass. Zug puechet i Süde. Schwümmhüt u Wösch tröchnet. Es superfeins Znacht ir Quartierbrass. Vorfröid ufe Küschtewächsu. D'Emozionspalette kunterbunter gieng nüm!   ↦ 39km   ↥ 260Hm

Tag 16 . . . Montag 30. September 2024
Mie Caline-Kaffee ufem Trottoir. E ser agnämi Zugfahrt uf Bordeaux (SNCF top). Zmorge us de Töpperweer im Park u chli Stadt-Flaniere.  

Tag 16 . . . Montag 30. September 2024
D'Witerfahrt ser ufribend (SNCF flop). Schpät aber acho. Zigzag-Fahrt mit Stirnlampe dür Narbonne. Super Ungerkunft chez Nicolas u mit letschter Energie aues, inkl. Velo, i dritt Schtock puggle (56 Schtuefe).  

Tag 17 . . . Dienstag 01. Oktober 2024
Usschlafe. Schlendere dür d'Märithaue. Feins Zmorge daheim. Dr Nami spatzierend bzw. am Compi verbracht. Dr witer Wäg ad Wärmi planet. Apéro u Romantik-Znacht uf dr schmucke Dachterrasse mit Liechterchötti. Geng meh Stärne am Himmu - nid nume vom Muscadet...  

Tag 18 . . . Mittwoch 02. Oktober 2024
Märitzmorge #2. Cruise nach Gruissan und o im Süde dörfe äs paar Rägetropfe nid fähle (gopf).   ↦ 31km   ↥ 100Hm

Tag 18 . . . Mittwoch 02. Oktober 2024
Naturcoiffure u Rasur zwüsche Flamingos u Storche. Gägewind u chli Irrfahrt zrügg uf Narbonne. Wösch zämelege, packe u vorbereite uf die nächste Zäut- u Velotage Richtig Katalonie - Olé! Zum Abschluss vo guete Narbonne-Tage gits Pizza ir "La Jument Verte" - mmmmmh...  

Tag 19 . . . Donnerstag 03. Oktober 2024
Bettgaffee. Sunne scho am Morge. Campingstüehlizmorge im Windschatte am Etang. Verluftete, wiud tanzende Schiuf im Gsicht. 60km/h Wind vor Site, hinge u o chli vo vore. Asträngendi Schlaglochpiste am Bahntrassee entlang. Samtegi Sandstrasse. Surfergaffee in Leucate. Loubbläser im Sturm - merci für Lachafau. Bänklipouse umzinglet vo fräche Eichhörndli. Vorrät bunkere im Biolade. Zäutplatz mit Speziaumöblierig für Velofahrer. Zwe Wuche i eim Tag erläbt.   ↦ 70km   ↥ 50Hm

Tag 20 . . . Freitag 04. Oktober 2024
Ersti trocheni Zäutnacht = äs chlises Fescht! Chemitoillette giz hüt o aus Rollkofferversion (hihihi). Nomau äs Gaffee am französische Mittumeer.   ↦ 25km   ↥ 100Hm

Tag 20 . . . Freitag 04. Oktober 2024
Iz geiz schüch bärguf Richtig Pyrenäen. Schöni, gschlängleti, früsch us em Bode gstampfti Velopiste. Picknickpouse mit Bänkli, Strom u Schatte. Umwäg über Le Boulou füre Iichouf. Schlusskilometer dürne schöne Park mit Spiuplätz für aui Generatione. Ihuse ufem schöne, ruhige Zäutplatz. Musig zum dusche - schön!   ↦ 34km   ↥ 220Hm

Tag 21 . . . Samstag 05. Oktober 2024
Zum Schlafsack us bärguf. Pyrenäen am töifschte Ort überquert - yeah! Schwungvoui Fahrt mit Sunne im Gsicht über d'Landesgränze. Chopf gschüttlet übere erschreckend Iichoufs-Tourismus. Lade gsuecht mit normale Läbensmittu. Dr dritt Aalouf isch glückt. Nomau ä Hügu ine angeri Wäut (furt vor Houptverkehrsachs) und ufne schön glägene, ruhige Campingplatz zwüsche Korkböim. Zerscht Mau Zyt und Muse fürnes Apéro bi Tagesliecht. Wäg Sand im Gas-Chocher-Getriebe hez de aber o die Pasta ersch im Schyn vor Stirnlampe gäh.   ↦ 25km   ↥ 420Hm

Tag 22 . . . Sonntag 06. Oktober 2024
Usgschlafe. Instant-Kafi u Müesli ufem verottete Bänkli. Gmüetlechs Zämepacke u mau wieder Richtig Meer pedale. Viu Landwirtschaft (Nase zue). Flöigeschwärm (Muu zue). Bänkli mit Schatte gsuecht u gfunde. Pouse am Fluss. Slalomfahre dür d'Sunntigsusflügler. Nomau schweisstriebends Bärguf u -ab u -uf id Residänz am Pinienwaud. Gepäck i dritt Stock bugglet u nomau äs paar Äxtrakilometer abgspuelet zure am Sunntig offne Iichoufsmüglechkeit. Chille u Schmouse uf dr Terrasse mit Meerblick.   ↦ 50km   ↥ 200Hm

Tag 23 . . . Montag 07. Oktober 2024
Ruhetag. Wösch wäsche. Batterie lade u plane.  

Tag 24 . . . Dienstag 08. Oktober 2024
Zmorge uf dr Sunneterrasse. Schwitze, Sunne, u Gägewind uf technisch aschpruchsvouem Ungergrund. Ds erscht Mau für Pouse freiwillig Schatte gsuecht. Palamos: Aui Campingplätz zue (gloub are Website ersch wet vorem offne Campingplatz-Tor schteisch). Merci Touri-Office für d'Vermittlig vom Hammer-Hotel für ke Priis. Meerbad u Znacht ufem Hotel-Bauköndli u das unerwartete Gschänk bim üsserscht scharmante, bärtige Rezeptionischt schpontan no grad umne Tag verlengeret.   ↦ 54km   ↥ 285Hm

Tag 25 . . . Mittwoch 09. Oktober 2024
Türkische Gaffee ufem Baukon. Ferietag am Strand (im-Po-Sand :-)). Flaniere, Wäueslalom, uf ds Meer luege u eifach Sy. Ersatz für ds gschlissene Wärtsachetäschli gänggelet. Usklang vom Tag wider ufem Bauköndli mit Wy u Gas-Chocher-Znacht.  

Tag 26 . . . Donnerstag 10. Oktober 2024
Balkonmüsli u blauem Outo vorem Hotel bim Koffer-Tetris zuegluegt. Romantisch-schweisstriebendi Küstestrass statt Velowäg gwäut. Immerwieder abe az Meer u ufe zum Luukaut - keuch! Die viele Rennvelofahrer hei gloub chli Mitleid mit üs u üsne schwäre Traktorvelos. 10km witer gfahre aus dänkt und zwüsche grosse Gämper üses Nastuech ufgspannt. Znacht mau wieder mit Stirnlampe schnabuliert u zu Meeresrusche u Rägetröpf iipfuuset.   ↦ 59km   ↥ 730Hm

Tag 27 . . . Freitag 11. Oktober 2024
Viu Räge ir Nacht. Müesli im Campingfauteil am Strand, ds Gsicht ir Morgesunne und ufz Tröchne vom Zäut gwartet. Lang schön am Strand entlang mit zwene Sackgasse und emne Stunt: dr Wäg diräkt am Ufer ds schmau für ds beladene Velo, dank de ungloubleche Fahrskills vom Pilot (Zitat P.) ds vorzytige Änd vor Veloreis abgwändet. Hei grad chli müesse hocke u ghirme. Guet triisg Kilometer, wos äbe de doch no i sich hei gha, nöcher a Barcelona grückt. Iichoufstour id City u nach Duschi u Znacht id Fädere gschloffe.   ↦ 35km   ↥ 178Hm

Tag 28 . . . Samstag 12. Oktober 2024
Rasche Ufbruch am graue Morge, vor dr erschte Rägewand no aues troche chönne versorge. Müesli das Mau ungerwägs, während dr zwöite Schütti am Schärme vore gschlossene Hafe-Beiz gmümmelet. U de nomau es Gaffe am Schärme churz vor Barcelona. När quer dür d'Millione-Stadt mitem Velo - eifacher aus dänkt. Viu Velostreife u vo Rotliecht zu Rotliecht immer am gäube Glovo-Rucksack mit gueter Musig nache (Queen, Dire Straits, etc.). Merci am Velovercherchsplaner vo Barcelona (Châpeau!). No zehrendi u ändlosi Kilometer am Flugplatz entlang richtig Camping-Platz Nummer eis. Dert aues psetzt. Witer zum zwöite Camping vo Castelldefels. Die haarschtröibende Rezensione hei sech dert leider bewahrheitet. Aus Troschtpflaschter gits e feini Pizza und es rise Tiramisu.   ↦ 74km   ↥ 216Hm

Tag 29 . . . Sonntag 13. Oktober 2024
Nach unruiger Samschtignacht unger Fluetliecht u mit viu Lärm ufem Camping knüttlet usem Zäut grobbt. Mir bruche Pouse u blibe trotzdäm nomau e Nacht. Zmorge im Park, Strandflaniere u Chnoche sortiere tuet guet. Feini Nachos unes Bier sorge für Ferie-Feeling. D'Aabeschtunde ufem itz viu ruigere Camping-Platz beinhalte nomau ä Chatzewösch ir desolate Sanitär-Alag u Schtuune übere Flugvercher wo üs im Zweminute-Takt ei Riesevogu ume anger übere Chopf jagt. Dr Wy usem Campinglädeli isch fein ud Nacht zum Glück viu ruiger aus no geschter.   ↦ 6km   ↥ 32Hm

Tag 30 . . . Montag 14. Oktober 2024
Im nasse Sand zämepacke. Aues ziemli bäää. Nomau uf das wunderbare Camping-WC und furt vo hie. Strandgaffee. Viu befahreni Küstestrass - ufabufab. Tupperware-Zmorge nach 20km am Strand. Zäut lüfte u chli atrochne. Am Nami isch heiss u mir schwitze Bäch. Si froh um die grossi Pouse in Tarragona mit Infraschtruktur für Gsamtreinigunge aller Art.   ↦ 78km   ↥ 580Hm

Tag 31 . . . Dienstag 15. Oktober 2024
D'Alarmalag ade Velo tougt u weckt o üs im Morgegraue. Nüd passiert. Öpä nume ä Stadtmoudi wo a die fautschi Fäuge het bislet. Markthaue-Bsuech u Brunch daheim. Stadtflaniere. Reko am Bahnhof für Abklärige vo Ideä rund um d'Fortsetzig vo üsere Reis. Unmüglich dekadänti Yachte im Hafe bestuunt. Ä Vermut ufd Brige gschlürft. Znacht u chli Sii im Daheim ir historische, härzige Autstadt.  

Tag 34 . . . Freitag 18. Oktober 2024
Früeche Start i Tag. Speditive Ufbruch zugunste vomene feine Gaffe mit Schoggicroissant gigante uf dr sunnige Rambla. Adeu Tarragona u Merci für die erholsame Pousetage. Fröidigs Losfahre, doch dr starchi Gägewind verblast d'Euphorie scho gli. Pouse am schöne Strand vo Cambrils. Küsteorte ab Tarragona würke pflegter u weniger schäbig aus no im Norde. Viu Houptstrass mit zum Glück sehr aständige Outofahrer. I dere Grüschkulisse z'Rattere vom einte Velogetriebe no gar nid richtig wahrgno. Uf dr chli ruhigere Strass, parallel zur Outobahn, de doch gmerkt, dass öpis nid ganz ok isch. Acho ufeme würklech schöne, pflegte Campingplatz. Duschi u Znacht bi Supermond ufem Chinderspiuplatz am fürnähme Houztisch.   ↦ 70km   ↥ 500Hm

Tag 35 . . . Samstag 19. Oktober 2024
Z'Tämpo bis iz isch z'höch gsi. Mir lehre u bliebe zwe Nächt a däm Ort. Erwache mitem engagierte Speaker vom Triathlon wo diräkt vorem Camping dürefüehrt. Mir gös chli gmüetlecher ah u schlürfe zersch mau äs Gaffee ufem Müürli am Meer. Drna äs lockers Sight-Seeing Fährtli im Ebre-Delta mit sine Riisfäuder u Wasserwäge.  

Tag 35 . . . Samstag 19. Oktober 2024
Zrügg ufem Camping pflege u putze mir üsi Kameu, schpeziell das wo geng lüter lärmet. Vo ihm heimer sogar es Videöli füre Härschteuer gmacht u zäme mit emne Hiuferuef a Support gschickt. Zum Bier, wieder ufem Müürli am Meer, luege mir dä inzwüsche doch zeichnete aber tapfere Triathlete uf ihrne letschte Kilometer zue.   ↦ 31km   ↥ 74Hm

Tag 36 . . . Sonntag 20. Oktober 2024
Fasch scho chli routinierts u lockers zämepacke vo üsne siebe Sache. Nomau äs Gaffee ufem Müürli am Meer. Stahlblaue Himmu u chli Summer-Feeling scho zum Losfahre. Blüehendi Blume, Sunne u gueti Velowäge ufem Wäg nach Ràpita. Nach Pigg-nigg uf dr schattige Stäge ar Strandpromenade a wunderschöne Küsteabschnitte vrbigradlet. Seelebalsam nach so mängem schäbigem Costa Brava Bunker. Ä viurtu Stund vor Ladeschluss spontan i Spar ghechet u mit Apero u Znacht die letschte Kilometer uf Peñiscola glärmet. Ds Getriebe macht iz würklech Sorge. Acho ufem Hubu zmitzt im Fischerdorf u froh het z'Velo düregha. Bier uf dr prächtige Dachterrasse mit Blick ufe Hafe uz Meer. Einisch meh - what a day !   ↦ 63km   ↥ 211Hm

Tag 37 . . . Montag 21. Oktober 2024
Barfuss Strandtag. Zmorge im sympathisch-lokale Spanierbeizli. Meerbad u chli sy. Bis zum Mail vom Velosupport u denn no zackig id Gäng cho: dä Drahtesu nach Aleitig usenang gno u tatsächlech fröidig dr worst-case vom defekte Getriebe chönne usschliesse. Hallelujah, äs fahrt wider grüschlos!  

Tag 40 . . . Donnerstag 24. Oktober 2024
Troumhafti Küstestrass für die erste u letsche Kilometer vo däm Tag. Drzwüsche immerwieder chli am Velo gmechet u versuecht die komische Grüüsch wägzbringe - ohni Erfolg. Ufem riesige Campingplatz zum Hausabschniderpriis acho. Dr Mercadona für einisch grad über d'Strass. Velomeche zum Dritte bringt d'Ursach iz Liecht vor Stirnlampe. Erfolgriich Campingfründe abklapperet uf dr Suechi nachemen 10er Inbus zum Kurble u Zahnrad wieder festzieh - Thanks man! Herbstlächi Chürbis-Pasta u U.M. Zwe stopps wäge Grüüsch vom Velo   ↦ 57km   ↥ 310Hm

Tag 41 . . . Freitag 25. Oktober 2024
Im China-Market ä eigete 10er Inbus erstange. Iz simer safe! Müeslizmorge u Zäut tröchne am Strand. Orangeböim. Überholt worde vo zwe weniger bepackte Veloreisende. Graue Himmu. Dr Wäg dür viu Beton u scho am Mittag düre Strassestriich gfahre. Beklemmend. Kafistopp vor de letschte Kilometer. Schlichende Platte ir Pampa. Mit nume Pumpe chönne chli witerfahre. Bim Iinachte mit Schnaps u Brot ufene rächt abgfuckte Campingplatz grollt. Wärs nid scho fiister u churz vorem erste heftige Räge, wäre mir nid gratis bliebe. Zäut ufsteue, dusche u choche i nöiem Rekordtämpo. Znacht entspannt, friedlich u illegal ungerem Dach vomene Miet-Bungalow glöffelet (hüt mau wieder Gmües u Linse - mmmmh).   ↦ 79km   ↥ 140Hm

Tag 42 . . . Samstag 26. Oktober 2024
Stürmischi Nacht. Blitz u Donner u Sturzbäch ohni Änd. Zum Erwache Bett für die nächschte Nächt puechet. Agglo und Downtown Valencia kombiniert mit Wucheänd si e Challenge. Derna bi blauem Himmu u Sunne dr Huushaut tröchnet u Velo gflickt. So chli Samschtig-Groove haut. Dä komisch Ort u Ghettocampingplatz de verla u dermit o zrügg ine fröidigi Schtimmig gfunde. Hamburgerschmous ufemne outhentische, beläbte Dorfplatz. U schlussändlech es paar letschti Kilometer bis ines schöns, pflegts Hotel ufem Land gradlet. Was fürne Tag vode Gägesätz.   ↦ 19km   ↥ 80Hm

Tag 43 . . . Sonntag 27. Oktober 2024
Entgäge de Wätterprognose troche uf Valencia troche uf Valencia gradlet. E super Velowäg bis id Schtadt. Ufem Wäg id Grossschtadt dr bärtig Glatzchopf gschore. Entrepans gschmouset, Ikouft u in Nazareth ds Appartement Pepe 4 bezoge.   ↦ 25km   ↥ 50Hm

Tag 45 . . . Dienstag 29. Oktober 2024
Zwe Tag Valencia erläbt: Tramfahre. Stadtbummle. Eduzmittag (meh fürz Oug aus füre Buuch). Hafespaziergang trotz Unwätterwarnig - Quak. Dernäbe Zugbillet fürne ergibige Hupf i Süde organisiert (chli gnue vo de ewig gliche, usgschtorbne, verlotterete u deprimierende Turischteorte). Si vorfröidig u gschpannt uf die erschte zwe Zugreise in Schpanie.  

Tag 46 . . . Mittwoch 30. Oktober 2024
Ufem Wäg iz Zäntrum nid viu gmerkt vom Unwätter letscht Nacht. Einzig ganz e artigi Schtimmig u e gäube, schwäre Himu hei mir wargno. Am Bahnhof vernoh, dass hüt u morn keni Züg fahre. Afa ahne, dass da öpis gröbers het gwüetet. Kafi u enttüscht afa umplane im verschohnte Stadtzäntrum. Frohen Mutes ufz Velo gstiege u Richtig Ersatzunterkunft usserhaub vo Valencia pedalet. Uf däm Wäg i öpis nid mit Wort beschriebbares inegfahre. Tagesschoubiuder mit voller Wucht säuber erläbt. Nachere bis ad Gränze fordernde Irrfahrt irgendwie uf die angeri Site vom Wasser cho. Dert vrnoh, dass die am Nami buecheti Unterkunft o unger Wasser steit. Drufabe si o Internet u Telefon usgschtige. Das het für üs zur Fortsetzig vor Odysee gfüert: e nächtlechi Fahrt vo Hotel zu Hotel uf dr Suechi nachemne Dach überem Chopf. Ds Almussafes het üs Jesus (ke Witz, dr Recepcionischt het so gheisse) es Zimmer gha u üsi Dräckgöple ganz säubverschtändlech la im Ruum mit Notschlafplätz parkiere. Muchisimas Gracias, Jesus!   ↦ 43km   ↥ 175Hm

Tag 48 . . . Freitag 01. November 2024
1. Novämber isch in Spanie dr "dia de los murtes" ä sehr wichtige, nationale Fiirtag. Mir hei funkzioniert. Nid me, nid weniger. Läärkoufti Supermärkt. Razionierti Trinkwasserabgab ufem Dorfplatz. Niemer, inklusiv Polizei, het e Überblick. Für üs schteit drum fescht, das mir üs afe mau uf dere, vom Wasser verschonte, Insle schtiu hei. Immer gsung, gnue vo auem u für das ser, ser dankbar.  

Tag 50 . . . Sonntag 03. November 2024
Tag für Tag kehrt hie chli meh Normalität i. Ds Biud wird klarer. Ä Sondierigs-Fahrt Richtig Valencia, i Vororte wo nach wie vor im Schlamm und Notstand si, bewegt erneut sehr u schliesst für üs ä Wäg zrügg i Norde us. Mir plane ganz süferli ä Fortsetzig vo üsere Reis Richtig Süde. U füele üs drbi nid würklech guet: dekadänt chunnts üs vor, üsi Reis witer ds fahre wo rundum sovili aues hei verlore. Einisch me si mir so dankbar für das wo mir hei.   ↦ 30km   ↥ 110Hm

Tag 51 . . . Montag 04. November 2024
Unger trüebem Himu, bi liechtem Nisuräge e früeche, agschpannte Ufbruch. Zwüsche "jeeeh, witerfahre!" u "was erwartet üs nach der nächschte Kurve?" pedale mir los u probiere i Richtig Süde Dischtanz zwüsche Ereignis u Schwäri vo de letschte Tage ds bringe. D'Fahrt düre grau, zytewis nass Tag, gschtautet sech überraschend problemlos. Bis ufnes paar unbeabsichtigti Meter uf dr Outobahn (merci Navi). Dank gschtäutem Bizeps und flinkem Lupf vode Göple über d'Leitplanke u Züün si die zum Glück glimpflech usgange. O ufem Zäutplatz isch bis uf paar grossi Glungge nüt ds merke vor stürmische Dana. Schön, nach de unfreiwillige Hotelnächt amne nöie Ort wider i Schlafsack ds schlüüfe.   ↦ 53km   ↥ 171Hm

Tag 52 . . . Dienstag 05. November 2024
Es früechs, unbeschwärts Erwache ine fründleche Tag. D'Schtrecki mit Profil lat schwitze u gniesse - die feusige Erhäbige lö chli a daheim dänke u tüe guet. Nach ere rasante Abfahrt ids schöne Schtedtli Xàbia si mir wortwörtlech übere Bärg. Ufem Cämpingplatz schpontan für zwe Nächt puechet - Valencia klingt no nache u die letschte zwe Tag hei gforderet. Pouse i däm schöne Ort chunnt wie gruefe. Usklang vo däm wunderbare Tag aus Rad-Reisendi ufemne Quartier-Platz zu köschtlecher 1500km Pizza!   ↦ 46km   ↥ 283Hm

Tag 53 . . . Mittwoch 06. November 2024
Usschlafe, köschtlechs Desayuno ire hippe Strand-Bar, Autschtadt-Bummu, e Usblick uf die nächschte Tage u de o scho gli wider a Schärme - ds Wätter schlat um.  

Tag 54 . . . Donnerstag 07. November 2024
Heftigschti Gwitter ir Nacht hei ds Zäut u üsi Närve schtrapaziert. Die erschte Schtunde ufem Velo si mir grad e Tigg ds weni schnäu für däm Räge ds entcho. Längi Mittagspouse zum Zäut ufschteue u aues la tröchne. Strand-Caffee unger itz strahlend blauem, versöhnlechem Himu im schiggimiggi Altea. U derna Ändschpurt uf Benidorm, dä Moloch. Dr Zäutplatz isch unerwartet härzig u ruig. Und aus früschi, proud ACSI-members es Schnäppli. Vo üsem Zäut us hei mir e super Ussicht uf die imposanti Skyline. Cämpe ir Grossschtadt - irgendwie no fräch!   ↦ 47km   ↥ 573Hm

Tag 55 . . . Freitag 08. November 2024
D'Fahrt bi Morgesunne us Benidorm lat schtune, die höch i Himu ragende, a Dubai erinnernde Boute, si dr Wahnsinn. Üsi Route füert längi Kilometer über Schnäuschtrasse u ernöit uf u ab. Es schweisstriebends Intervalltrening. O hüt gits e Pouse für Picnic u Zäut tröchne. Derna fouge pouzegradi, ändlosi Kilometer dür di viubefahrni Induschtrie vo Alicante. Lut, aschträngend, nid ungfährlech u zehrend - die erschti Stadt ohni Velospur. Hinger use si die letschte Kilometer über Land de umso me e Woutat. Akunft bim Inachte in Santa Pola. No hurti Ichoufe, id Ungerkunft ga Wösch schtarte u de mit vouem Buuch ab ids Chörbli.   ↦ 73km   ↥ 526Hm

Tag 56 . . . Samstag 09. November 2024
Innehaute über ds Wucheänd: erhole, regeneriere u chli sii. Ob mir d'Saxophon-Kläng vo Menks Kolleg äch no ghöre?!  

Tag 58 . . . Montag 11. November 2024
Nach erholsame Tage ure superfeine Pizza in Santa Pola West bi bestem Velowätter wieder ufbroche. Vrbi a riesegrosse Feriensiedlige, änglisch u französische Wärbeplakat. Ändlos längi, schäbigi, uf billigste Strandtourismus zugeschnitteni Konsumangebot. Üs isch hie nid wohl o we mir nume dran vrbifahre. Dr agstüüret Camping het no Platz u für einisch simer nid ersch ir Dämmerig am Zäut ufsteue näb dr Petanque-Bahn.   ↦ 58km   ↥ 444Hm

Tag 59 . . . Dienstag 12. November 2024
Ideale Start i Tag - Gaffe am Campingpool. Dank Tipp vore velofahrende Dänin, si mir nid diräkt ar Strass na, sondern amene fasch outofreie Bewässerigskanal entlang vo ändlose Triebhüser u Orangeplantagen gfahre. Bis zum ufcho vom starche Gägewind entspannts Röuele näbenang. Die letschte Kilometer id Stadt si sträng. Uf dä Stümpe schiebe mir üsi Velo id Loft vor Ío, üses daheim für die nächste Täg.   ↦ 53km   ↥ 199Hm

Tag 61 . . . Donnerstag 14. November 2024
Novämberwätter o hie. Cartagena nimmt üs nid grad dr Ermu ine. D'Innestadt, d'Ruine vode Mühline ufem Hügu u dr Hafe si schnäu erkundet. Zum Lüchtturm, Usflugtipp vo üsere Gastgäberin, geiz chli länger. Üs isch i dene Tage schwär umz Härz. Dä Teil vo Spanie wo mir bereise macht üs nid glücklech. Zyt fürne Änderig...  

Tag 63 . . . Samstag 16. November 2024
Nach rägnerisch-graue Tage in Cartagena simer wieder ungerwägs. Witer richtig Süde reizt üs nüm. Mir bruche Rueh, Schlaf, Meer, um wieder uf Idee z'cho. Drum fahre mir zrügg Richtig Santa Pola. Dert ischs üs letscht Wuche wou gsi. Pickuherti fasch 70km gäge Wind, dür schlammigi Fäuder u Schlagschlochpiste, simer froh, einisch meh äs Hotel z'finde, wo üs u üsi Velo nimmt, (dräckig) wimer si.   ↦ 70km   ↥ 353Hm

Tag 64 . . . Sonntag 17. November 2024
Entgäge dr Prognose hez hüt mau ke (Gäge)Wind. Die 35km wärde drum zum gmütleche Sunntigsfährtli. Mir näme z'Gschänk gärn a u gniesse früecher aus erwartet äs Kafi am Weststrand. Künstler Juan zeigt üs sini Wohnig im East-End vo däm Fischerort u versorgt üs mit hilfriiche Insidertipps. Sis Logis mit grossem Baukon, unschlagbarer Meersicht i ruiger Umgäbig isch ä Wohltat. Ä guete Ort für sich z'sammle, ufztanke, Ferie z'mache u eifach äs paar Tage la z'verstriiche (jour par jour äbe).   ↦ 35km   ↥ 199Hm

Tag 68 . . . Donnerstag 21. November 2024
Mehreri Tagesuflüg für Sunneufgäng, Caffe(s) am Strand, Läse und uf ds Meer luege i louschige Buchte lade üsi Batterie ume uf. Zum Schwümme ds wit u mit em Velo nid ser gäbig drum näme mr ds Turi-Boot ufd Pirateinsle Tabarca. E unerwartet saftig-grüeni Insle. Mir gniesse, itz mit 50 Lüt pro Tag schtatt wi ir Peak-Season 4'000, uf de gwundene Pfade ds schlendere. Zrügg a Land isch de o scho höchschti Zyt fürnes Apélooo.  

Tag 71 . . . Sonntag 24. November 2024
Diräkt vor dr Hustür richtig Oschte schlänglet sech e idyllischi, weni befareni Schtrass ar Küschte na. Nach emne knackige Ufschtig si mir ufmene Plateau ob dere Küschteschtrass. D'Ussicht uf Tabarca u viu witer, e Irrgarte us gschlungne Naturwäge, fründlech grüessendi Schpaziergänger u Tschogger erwarte üs dert. Ei Wuche ds Santa Pola isch im Nu verbi, no chli me dervo tuet guet u drum verlänger mir üse Ufenthaut bi Juan.   ↦ 41km   ↥ 292Hm

Tag 72 . . . Montag 25. November 2024
Nach wenige Kilometer ungerwägs wärde mir verrägnet. Drum chere mir d'Velo u inveschtiere ä ganze Öiro ine Hochdruckreinigung vo üsne scho wider Schlamm verkruschtete Göple. Dr zwöit Alouf für üse Usflug glingt u füert über ruigi Überlandschtrasse, verbi a risige Artischoke-Fäuder, Boum- u Kaktusschuele uf Elche. Schtatt Caffe-Phouse ir Autschtadt bevorzuge mir ds Zrüggfahre no bi Tagesliecht u gniesse es Apéro ufem Hafemürli zrügg ds Santa Pola.   ↦ 54km   ↥ 271Hm

Tag 74 . . . Mittwoch 27. November 2024
Dr Wäg zur köschtleche Pinsa füert hüt dürnes Vogu-Reservat, im Zig-Zag dür d'Landwirtschaft (hüt vorwiegend Granatöpfu-, Zitrone- u Artischoke-Plantage) zum Strand vo La Marina. Für richtig Hunger ds übercho schiebe mir ds Velo 10 Kilometer am Schtrand entlang, überquere das Mau es Gwässer ohni Boot (e Oberschänku töife Meeresarm) u si de nid ganz unglücklech in Santa Pola West wider uf Asphalt ds schtosse. D'Pinsa isch super gsi.   ↦ 55km   ↥ 280Hm

Tag 77 . . . Samstag 30. November 2024
Nomau ä letschte, typische Santa Pola-Tag gniesse: Sunneufgang vom Bett us, Playa-Gaffee, Märit, Velo parate, packe. Chli wehmüetig nach dere wohltuende Pouse im u um das Stedtli. Glichzytig vorfreudig wieder i Bewegig z'cho: Morn geits witer!   ↦ 55km   ↥ 550Hm

Tag 78 . . . Sonntag 01. Dezember 2024
Nach Gaffee u Zumo im Good-Mood geits wieder witer. Müesli zur Morgemäss vorem Chiuchli in San Felipe. Viusittigi Landschaft: Hügle, Schiuf u Palmewäuder. Gränze nach Murcia äs witers Mau überquert. Aues würkt so viu angers aus no am Meer vore.   ↦ 77km   ↥ 151Hm

Tag 79 . . . Montag 02. Dezember 2024
D'Velo hei wägem wenig kooperative Receptionist müesse uf dr Strass bliebe - u hei o das guet überstanden. Mercadona Zmorge näb de Gmeindsarbeiter. Vrbi ä riesige Fäuder Broccoli, Artischocke u Zitrusfrücht. Ärntezyt = Schaarewiis Ärntehäufer ir Lüüchtweste uf dä Fäuder. Isch äch dr Migros-Broccoli o us Murcia?   ↦ 50km   ↥ 433Hm

Tag 80 . . . Dienstag 03. Dezember 2024
Schiisnacht im Hotel Plaza. Nomen isch nid immer Omen... Nachem hippe Self-Check-in Outomat ischs vrbi gsi mit hipp. Dr Beck näbedrann het vieles wieder wett gmacht. Vierzig Kilometer liecht bärguf u gäge Wind wäre usgruehter öpä o gäber gange. D'Gmüesfäuder hei hüt nomau ä nöii Dimension. Grösser aus Thuner- u Brienzersee zäme, erstrecke sich vo Horizont zu Horizont bepflanzti Fäuder. Dr Wahnsinn! Nach Gaffee u Pipi in Pulpi suse mir bärgab az Meer u gönne üs ä Pousetag.   ↦ 78km   ↥ 272Hm

Tag 82 . . . Donnerstag 05. Dezember 2024
Usgruit u voller Elan geiz im Garracho uf Garrucha. Wiedermau äs Zmorgemüesli usem Tupperware ufemene Steimüürli am Meer = Heaven :-) Die kurveriichi u schweisstriebendie Küstestrass isch wunderschön. Z'Meer wird rüücher, mä cha dr Atlantik scho fasch schmöcke. Nach idylischem Strandstopp in Aguamarga geiz ufe u düre Parque Natural Cabo de Gata Nijar. Wiit, schöön u bis ufe pfiifend Gägewind ide Ohre ruhig. Andalusie gfaut!   ↦ 57km   ↥ 807Hm

Tag 83 . . . Freitag 06. Dezember 2024
Samichlous im Kaktus gfunde - juhui! Dank de chüele Temperature ir Nacht isch däm Schoggimaa nüd passiert. Ersti Kilometer Richtig Morgegaffee mit klamme Finger gfahre. Am Tassli Cafe con Leche gigante si die gfrorene Tatze rasch uftout u hei z'gfüllte Schoggigipfeli möge ergriife. Dr Picknick-Stopp zwüsche de ändlose Gwächshüser ufere brache Stäge isch ä chli weniger kuschelig gsi. Hüt nüm im Naturpark ungerwägs sticht üs die erschreckendi Mängi a Ghüder am Strasserand grad wieder iz Oug. Die letschte 15km heis nomau in sich. Gägewind, bärguf, viu Verkehr u Tunäu a Tunäu fordere. Statt wie gmeint im Hotel, tschegge mir bi öperem Privat id Stube i (mängisch sött mä haut z chli druckte ono fertig läse). Immerhin funktioniert üse Gaschocher o uf däm Whirlpoolrand im Badzimmer - unbemerkt vo üsne gastunfründleche Hosts. Drfür fägt dr CD-Spieler mit Vivaldi.   ↦ 63km   ↥ 310Hm

Tag 84 . . . Samstag 07. Dezember 2024
Erwache im chüele, düregstylte Huus wei mir so schnäu wies geit furt vo hie. Nach Kafi u Iichouf geiz a länge Ramblas dür urbani Orte bärguf. Hüt si mir fasch nume uf dr Houptstrass ungerwägs. Chli Abwächslig git ä Abstächer vrbi a Tomate-Pepperoni-Plastig-Hüser. Für einisch gö die letschte wenige Kilometer bärgab zum hütige Logis. Dert öffnet üs ä scharmanti, euteri Dame ihres Tor u ihres Härz. D'Mercedes beherbärgt i ihrer Hacienda (Velo)Reisendi us auer Wäut. Mir fühele üs sofort wie daheim. Was fürne Woutat u was fürne Kontrast zu Gester. Mir wärde beschänkt mit ämene Hängematte-Terrasse-Abesunne-Meerblick-Fürabebier-Momänt. Früsch duschet gniesse mir z'choche u dr Abe mit dr Mercedes u em Laurent us Frankriich. Nume ungerbroche vo Charlies Ahänglechkeite (ds rote u vorwitzigschte vo drüne junge Büssi).   ↦ 58km   ↥ 462Hm

Tag 85 . . . Sonntag 08. Dezember 2024
Dr viert schträng Bewegigstag in Serie schtarte mir früe. Nachem Zmorge uf dr Terrasse u härzlechem Abschid vo Mercedes u Charlie geits los. Di geschter luti, schtarch befahrni Schtrass isch hüt fasch läär u bietet e ächt schöni Szenerie. Es isch schträng u brucht me Phouse aus süsch. Wätter, Wind u Landschaft si uf üser Site u gäbe Energie für o die Etappe ds meischtere. Düre aber schtouz chöme mir ds Almuñecar a. Nach Pasta u Wy bruchts ke Guetnachtgschicht me für chönne ds Pfuuse.   ↦ 67km   ↥ 744Hm

Tag 88 . . . Mittwoch 11. Dezember 2024
Zum Bett us geiz afa mau übere erscht vo drei Hügle bis zum Gaffee. Mit über 50kg Velo ä rächti Morgefitness - puuuuh. Kafi u Tostada tüe guet bevors im Räge über die zwe witere Hügle geit. Dr erhofft Rüggewind bliibt über wiiti Strecki ä Wunschtroum vor Meteo-App. O die lokale Rennvelöler biiste gäbig ar Ample über dä windig Tag. Churz vor Málaga begleite üs näbst Tube u Spatze ono grüeni Papageie - ä schöni Überraschig. Düre dicht Verkehr fahre mir vor Agglo bis id Innestadt, wo mir üses Logis ir Fuessgängerzone bezieh. Für einisch schlafe üsi Rösser imene Parkhuus u si so wiit furt vo üs wie no nie. Dr Usklang vo däm witere pumpevoue Velotag gniesse mir bi Pizza Terra Mia, Tiramisu e Grappa.   ↦ 82km   ↥ 665Hm

Tag 89 . . . Donnerstag 12. Dezember 2024
Äs schiffet i Ströme u isch chaut. Zmorge Downtown u später si die mit Haar zum Coiffeur u no hübscher zrüggcho. Ir Geburtsstadt vom Pablo liegt amene Rägetag wie hüt dr Bsuech vom Museo Picasso uf dr Hand. Nachem Schlürfe vo warme Udons hechte mir äs letschts Mau dür d'Sturzbäch u hoffe zum Iischlafe sehr, dass dr Wätterbricht für morn stimmt us ir Nacht hört rägne.  

Tag 90 . . . Freitag 13. Dezember 2024
Mir starte unger fründlechem Himmu u si froh finde mir üsi Velo nach zwe Tag Tiefgarasch unversehrt vor. Dr Wäg us dr Stadt isch läng u dr dichti Verkehr laht üs dr ganz Tag nid los. Mangels Alternative müese mir mehreri Mau äs paar aagspannti u stressigi Kilometer ufd Autovia (ä Mischig us Outobahn u Schnäustrass). Das isch zwar nid verbote aber o ke Schläck. Ds hütige Lieblings-Chleidigsstück isch drum d'Lüüchtweste. Froh u knüttlet chöi mir üsi Velo grad ir Hotellobby la stah u äs grosses Zimmer im achte Stock bezieh.   ↦ 71km   ↥ 545Hm

Tag 91 . . . Samstag 14. Dezember 2024
O ire verhäutnismässig churze u vermeintlich harmlose Tagesetappe chöi sich sämtlechi Zuetate vomene ächte Veloabendtüür finde: Velo düre Schlamm bugsiere. Zig Mau uf ab uf ab uf ab dür nobli Quartier u vrbi a grosszügig agleite Golfplätz. Wäg fählende Brügge (Unwätter Dana) d'Schueh abzieh u Velo düre chnöitöif Bach stosse oder umchere und ä angere Wäg sueche. Äs paar adrenalingladeni Meter Autovia überläbe. Erschöpfti Pouse ufem Troittoirrand zwüsche Tanksteu u Burger-King. = So intensiv chöi 35km si.   ↦ 35km   ↥ 400Hm

Tag 92 . . . Sonntag 15. Dezember 2024
Pousetag im schmucke Estepona. Hafeschlendere, Naturcoiffeur für die Velofahrer mit Bart, viu schlafe u ab und zue dr Chopf lüpfe zum Luege öb z'Meer no da isch. Tajine u Couscous bim Marokkaner ums Egg. Gueti Vollmond-Nacht!  

Tag 94 . . . Dienstag 17. Dezember 2024
Nomau Erwache im Bett mit Meersicht. Die erschte zwänzg Kilometer müesse mir nomau uf dr Autovia pedale. Dr Penner vorem Supermarkt luegt üs mit unwiderstehlich-hungrige Ouge a u überchunnt drum ä Teil vo üsem Iichouf. Während em Picknick-Zmorge am Strand im Windschatte vore Baragge überchöme mir Bsuech us Kanada u hocke wenig später bi Gaffe u Chueche im ziemli abegrockte Camper vo Gill u Chris us Vancouver. Das isch Reise - gä u übercho. Adjeu Mittumeer u adjeu Autovia. Äs geit überne super Velopiste uf u ab iz grüene Hinterland. Erstuunläch schnäu änderet d'Landschaft: Grüeni Wiese, raschelnds Herbstloub, roti Chüeh, Storche u zig Windräder (aka Wimseli).   ↦ 61km   ↥ 605Hm

Tag 95 . . . Mittwoch 18. Dezember 2024
Usgiebigs Hotelzmorge nachere Nacht im Töifschlaf. Churz nachem Ort höre dr Asphalt u dr Verkehr uf. Im Mountainbike-Stil dürquere mir dr Parque Natural Los Alcornocales mit eim vode grösste Korkwäuder vo Spanien. Die sehr aspruchsvoui Topographie uf usgwäschne Naturwäge verlangt üs einiges ab u git no viu meh zrügg. Ä perfekte Velotag ir grüene, stiue Natur, begleitet vo Geier, wiude Ross, zahme Schaf, rote Chüeh, Eidechsli, Gemschi u Störch. Ungloublech stränge Seelebalsam. Dr Park wot üs nid lah ga. Dr Wäg drus use isch mitemene grosse Tor verrieglet. Mir fahre witer zum nächste Tor u hei Glück. Ä Pick-up mit Büetzer kennt dr Code für Sesams Tor zrügg uf d'Teerstrass. Dr Wäg id Zuvielisation wot nomau verdient si. Mit suure Bei geiz bouzgredi z'Loch uf. Nach däm intensive Tag si Copas vom Faro Trafalgar Semidulce ir kuule Dorfbar, ä Duschi u warms Fuetter vom Gaschocher no besser aus schüsch.   ↦ 45km   ↥ 828Hm

Tag 96 . . . Donnerstag 19. Dezember 2024
Ds Navi leitet üs zuerverlässig übere höchscht Punkt vom Dorf. Derna füert d'Schtrecki dür witi Chueweide, Ächer, vrbi a bewaudete Hügle - e Szenerie wo gwüss chli a Daheim erinneret obwou si wit wäg zwüsche Mittumeer u Atlantik ligt. D'Vorfröid uf di längi Abfahrt nachem Gipfu vor Tagesetappe wird vom zügige Weschtwind schnäu brämset. Ungerem inzwüsche graue Himu fahre mir dürne Naturpark. Dr erscht Rägeschprutz hocke mir bimne Gaffee ds San Fernando us u schwinge üs derna frohen Mutes wider uf ds Velo. Dr Spuk isch aber nid usgschtande, di zwöiti Rägewand verwütscht üs schonigslos. Nach nur wenige Minute Räge, Sand- u Schlammpischte hiuft nume no dr Hochdruckreinger vore Tankschteu. Dr letscht Kilometer uf dr Eurovelo 8 fahre mir mit glänzende Velos bi Sunneschyn uf Cádiz u somit zrügg a Atlantik. Gfüllt vode letschte Tage und feinem Znacht bim Inder si mir satt uf jeder Äbeni u plumpse ids Bett i dere drütuusig-jährige Schtadt.   ↦ 66km   ↥ 414Hm

Tag 99 . . . Sonntag 22. Dezember 2024
Drü Stadttäg in Cadiz. Eine drvo dr chürzischt vom Jahr. Au drei mit viu Sunne, feinem Ässe, viu Kafi u Wy, chli Kultur u Gschicht u mägem Schritt z'Fuess. Zytloses la triebe, Atlantik inhaliere u die vergangene 99 Täg la Revue passiere.  

Tag 100 . . . Montag 23. Dezember 2024
Chaut isch d'Luft a däm früeche Morge. Aber warm ischs um z'Härz: feinsti Churros con Chocolate (dr Löffu steckt würklech fasch drin) si köstlich u erlichtere dr Start i dä nöi Tag. Nach sim Afang in Cádiz, si das die erschte Eurovelo 8 Kilometer. Mit Rüggewind düse mir se Richtig Süde, vrbi a Sanddüne u quer dür zwe Naturpärk. Wos de furt vom Atlantik ids Inland geit, söime usdehnti Chueweide u Agrarland d'Szenerie. Zum Dessär chunnt e zwe Kilometer längi, am Afang no zahm u immer schteiler aschtigendi Strass zum hüttige Ziu. Ds Aberot u d'Witsicht vo däm Hügu us lö die brönnende Bei gli la vergässe.   ↦ 64km   ↥ 507Hm

Tag 101 . . . Dienstag 24. Dezember 2024
Fürne heitere, heilige Abe ir wiise Stadt decke mir üs i ir vermeintlech ganz gäbig erreichbare Bodegas Gallardo mit gnueg Faro de Trafalgar Semidulce i (entdeckt in Benalup). Das "Gäbig" entpuppt sich aus steils Hoger ab - Hoger uf. Das no vorem erschte Gaffee macht mä würklech nume fürne edle Tropfe. Grad iz zu dene Ziele läärt sich scho die erschti Guttere - oh du Fröhliche!   ↦ 6km   ↥ 210Hm

Tag 102 . . . Mittwoch 25. Dezember 2024
Nach usgiebigem Fiirtagszmorge suse mir dürne saftig grüeni Biuderbuech-Landschaft dr Hoger abe az Meer. Fertig Strass, barfuess Velo düre Sand schiebe, iz Meer gumpe u dr fotogen Faro knipse.  

Tag 102 . . . Mittwoch 25. Dezember 2024
Üse Usflug iz Wiehnächtlich usgstorbene Barbate füert dürne wunderbare Pinien-Naturschutz-Park. Z'ersehnte Kafi überchöme mir notgedrunge nume im McCafe. Drfür mit sauzige Patatas Deluxe.  

Tag 102 . . . Mittwoch 25. Dezember 2024
Wieder zrügg ufem Hoger obe - keuch-ächz-schnauf - gönne mir üs ä witeri Fläsche Faro de Trafalgar, iz womir wüsse woner steit. U statt Wiehnächtlechem Glogge- u Trychlerglütt ghöre mir dr Wind um ds Huus chlefele.   ↦ 37km   ↥ 474Hm

Tag 104 . . . Freitag 27. Dezember 2024
Früechs Erwache. Duss chutets no geng nid ds knapp. Mir si optimistisch u vertroue einisch meh uf d'Windprognose wo seit, dass es nume hie obe ufem Gupf so heftig tuet. Bis a ds Meer füre rollts guet a däm sunnige Tag. Chum us Barbate use, chutets üs fasch vom Velo. Ds Picnic gits drum scho gli ire haubwägs gschützte Bushautschteu. Dr Gägewind mit 40-70 km/h macht di eigentlech gäbigi Dischtanz zure nid ungfährleche u mentale Mammut-Ufgab. Daheim im Haslital hei mir zum Glück scho öfters chönne üebe gäge schtarch Wind ds fahre (Bise/Föhn). Aber dert wärs üs no nie im Troum i Sinn cho bi somne Blas so wit ds fahre. Drmit nid gnue, füert üs di globali Satellite-Navigation zueverlässige a soutüre Ville a troumhafter Hanglag mit Meersicht verbi ine witeri Sackgass. Nach usgibigem Studium vo Satellite-Biuder vo de nid üppige Opzione (merci Google-Maps) entscheide mir üs d'Göple, eine ume anger, ufwärts dürnes trochnigs Bachbett ds bugsiere u chöme nach aschträngender Plakerei doch tatsächlech wider uf Asfalt. Halleluja! Doch o bärgab müesse mr pedale, dr Wind wird kes Müü weniger. U no geng trennt üs e über 200 Meter höche Pass vom Tagesziu Tarifa. Das erreiche mir, o dank üsem Büffugring, ersch bim Inachte. Eifach nume kaputt gheie mir ids Bett.   ↦ 56km   ↥ 760Hm

Tag 109 . . . Mittwoch 01. Januar 2025
Dr windig Verschiebetag uf Tarifa het ghörig nacheklunge. D'Erholig het Zyt brucht. Physisch isch das dr aschpruchsvouscht Tag vo üsere über 3000km länge Veloreis gsi. Drum hei mir üs die letschte Tage begnüegt mit Schlendere, Kitesurfer beobachte, Küschte- u Schtrandschpaziere, Läse u Döse... Ds nöie Jahr hei mir mit ere abwächsligsriiche Fahrt dür viu Grüen, über Sandpischte dür Piniewäuder zu de Bolonia-Düne begrüesst u drzue dr Räscht-Alkohol vom Sylvester usegschwitzt. E Sehnsuchtsort sige die Düne isch üs gseit worde u das ungerschribe mir!   ↦ 60km   ↥ 350Hm

Tag 112 . . . Samstag 04. Januar 2025
Us feschter Behusig hei mir ds Tarifa d'Gägend erkundet. Ds Füdle im Atlantik gschwänkt (brrr), bir Helena fein zmörgelet u für einisch keni Böim usgrisse. Wahnsinnig dankbar u o chli stouz stöh mir am südwestlechste Punkt vom europäische Festland - mitem Velo! Gwachsene Oberschänkle u Sunne im Gsicht. Hie chere mir um u reise wieder hei. Merci Universum für über 100 Täg gsunds mitenang, fürne grosse Rucksack vou kunterbunte Erläbnis, Gschichte u Erfahrige. Merci hesch üs in Valencia unversehrt bis dahäre la witerfahre. Mir fröie üs uf gueti Lüt daheim, uf Bärge, Chäs u Schnee. U druf witeri, spannendi Kapitu zschriebe.   ↦ 44km   ↥ 400Hm

Tag 113 . . . Sonntag 05. Januar 2025
Einisch meh entscheide mir üs nid füre diräkt u eifach(er) Wäg, sondern gäbe dr vermuetlech schönere Strecki dr Vorzug. Zwar dütlech stränger, drfür o eifach nume schön dr Strass vo Gibralter entlang z'pedale. Für Pouse gniesse mir nomau dr Äxtra-Komfort uf usne praktische Campingstüehli inmitte vo friedlich grasende Rinder u mit bestem Usblick uf Afrika. Di letschte Kilometer uf Algeciras giz nomau ä zig-zag-uf-ab Fahrt düre Gister, vrbi a ströinende Hühner u quer dür d'Industrie. Mit viu Söi chöme mir wenigi Minute vorem heftige Räge, wo di ganzi Nacht wird dure, iz Hotel. Dr Griff vor Gas-Chocher-Pfanne laht üs bi sim vorerscht letschte Iisatz im Stich. So putze mir dr Badzimmerbode, statt üs dr Buch vou z'schla.   ↦ 34km   ↥ 723Hm

Tag 114 . . . Montag 06. Januar 2025
Ds Zmorgebüffet beschert üs nachem eher dürftige Znacht e gfröite Schtart i Tag. Ds Timing isch perfekt: mit em Losfahre Richtig Hafe hört dr Räge uf. Närvös u agschpannt, säubverschtändlech schwizerisch pünktlech, reie mir üs zwüsche gigantische Cämper u Fahrzüg wo d'Fantasie schpränge mit üsne bescheidne Drahtesle i. D'Überfahrt uf Tanger verlouft churzwilig, agnäm u fasch ohni Zwüschefäu. Ds arg i Mitlideschaft zogne Cap vom Pilot wo bis dato mänger planeter Beschtattig isch entcho, wird mit ere chräftige Böe uf ds Meer gwäit. Adiòs, compañero!  

Tag 114 . . . Montag 06. Januar 2025
Die wenige Stunde in Marokko hei mir vrbracht mit Iireiseformalitäte u Velo la fiuze, Warte, Boardtickets abhole, Gaffee trinke zum Warte, ufem Wäg zur Passkontrolle Bluemechistli apöble (Bluemechistli isch leider stercher gsi, mimimi), Wunde läcke zum Warte, Slalom dür ewig längi Outoschlange bis zum extrem langsame X-Ray Scanner fahre, wo jedes Fahrzüg, sogar üsi Velos, grönget wärde. Vo dert a flutschts u mir si gli an Bord vor gigagrosse GNV-Fähre u Warte...  

Tag 116 . . . Mittwoch 08. Januar 2025
Zwe Tag u zwe Nächt uf See. Wind im Haar vo dene wo hei, Sunne ufem Gsicht u wohltuendi Zwangsentschlöiniung tüe guet. Schtund um Schtund gleite mir über ds tätschflache Mittumeer mit Blick uf d'Küschte vo däm Schpanie. Das aues si mir tatsächlech pedaliert. Es berüert u git Glägeheit üsi Reis no einisch ds dürläbe, i Erinnerige ds Schwelge u bi mängem Ort u Egge Gschichte u Erläbnis füre ds nä.  

Tag 116 . . . Mittwoch 08. Januar 2025
Nachem Müeslizmorge a Deck u ribigsloser Ireis röuele mir wenigi Meter nachem Hafe scho ufemne perfekte Velowäg los Richtig Montpellier (gäge Wind, verschteit sech). Trotz dere top Pischte si mir näb dr Schpur. Mir si da u glich nid so ganz.   ↦ 37km   ↥ 240Hm

Tag 118 . . . Freitag 10. Januar 2025
Montpellier fägt o im Winter! Nach guete Nächt i schtilvoue, aute Muure umgä vomne grosse, ruige Garte verbringe mir ungernämensluschtig Flanier-Schopp-Schmous-Schtadttage. U machenis parat für die letschte Reisetage en train.  

Tag 119 . . . Samstag 11. Januar 2025
Zum Abschied us Montpellier bruche mir zu früecher Stund nomau di ganzi Rägemontuur. Drfür klappe die drü TER-Verbindige sidefin u bringe üs scho am früeche Nami uf Grenoble. Söfu im Norde obe ischs no grad mau ä Chutte cheuter. Drzue chutets nid zknapp - brrrrr. Zum Glück si die zahlriiche Läde bis spät am Abe offe u gheizt. C'est une jolie ville !  

Tag 120 . . . Sonntag 12. Januar 2025
Letschte Reisetag. Üs isch chli komisch zmuet. O hüt klappets mit de Zugverbindige bestens - Merci SNCF et CFF. Ungerwägs lö mir immerwieder ä Zug us, trinke äs Kafi, choufe i (z.B. in Bern: Moritzbier - Barcelona) u näme üs Zyt zum düreschnuufe. Doch o so geits no z'schnäu. Äs bruucht de mehreri Tage (Wuche?) bis o d'Seu süferli zrügg im Winter achunnt. Merci für di gschnutzti Garageifahrt, Lindorchugeli ufem Chopfchüssi, sortierti Poscht, pflegte Pflanze, öies Begleite uf üsne erläbnisriiche u unvergässleche über 3000 Velokilometer! GRACIAS, MERCI u bis gliiiiiiiiiiii!